Калі нараджаецца дзіця, на небе нараджаецца яго зорка. Здараецца так, што калі чалавек памірае, гэта зорка пачынае ззяць яшчэ ярчэй.
На вечарыну памяці знакамітага рэжысёра, акцёра і сцэнарыста Міхаіла Пташука пад паэтычнай назвай «Ярка свеціць зорка Пташука» запрасілі ў Ляхавіцкую цэнтральную раённую бібліятэку імя Янкі Купалы. Мерапрыемства, арганізаванае ляхавіцкімі бібліятэкарамі сумесна з аддзелам па адукацыі Ляхавіцкага райвыканкама і літаратурна-музычнай гасцёўняй «Крыніца» пры Баранавіцкай раённай цэнтралізаванай бібліятэчнай сістэме абяцала ўсім аматарам і прыхільнікам сучаснай беларускай культуры цікавыя сустрэчы і знаёмства з роднымі, блізкімі і сябрамі творцы.
Пра Міхаіла Пташука на Ляхавіччыне памятаюць і ім ганарацца. Просты хлопец з невялікай вёскі Федзюкі, імя якога стала вядома ў кінаіндустрыі на міжнародным узроўні, у рэжысёрскіх працах якога з задавальненнем здымаліся знакамітыя савецкія, расійскія заслужаныя артысты, фільмы якога знаходзяць водгук у душы кожнага беларуса – усё гэта наш зямляк Міхаіл Мікалаевіч Пташук.
У сваім дзённіку Міхаіл Мікалаевіч пісаў: «Все, что я снял, имеет отношение к истории белорусской литературы ХХ века. И Владимир Короткевич, и Иван Шамякин, и Василь Быков – это уже история. В каждом фильме, снятом по произведениям, есть частица меня самого, моей матери, соседей – людей, среди которых я вырос. Если внимательно посмотреть мои фильмы, то можно убедиться, что в каждом из них одна и та же изба по планировке. Читая повесть «Знак беды» Быкова, я видел свой дом, в котором вырос и из которого так рано ушел в люди. Мне не надо было ничего придумывать. Все герои двигались по моему федюковскому дому, мне было легко с ними, я знал каждый их шаг…».
Міхаіл Пташук любіў сваю малую радзіму і даражыў ёю. Гэта адчуваецца ва ўспамінах стрыечнай сястры Аліны, пляменніц Святланы і Тамары. Сюжэты для сваіх фільмаў ён бачыў амаль паўсюль, але асобнае месца сярод іх займаюць вобразы родных мясцін. Шмат цікавых сямейных гісторый пачулі ад родных: пра казусы на хрэсьбінах, працагалізм і ўцёкі з санаторыя, як частаваў амерыканца мачанкай, пра творчыя споры з жонкай Ліляй. Ад такіх свойскіх, утульных гісторый усе ўдзельнікі вечарыны, здаецца, адчулі сябе амаль блізкім сябрам Міхаіла Пташука.
Лірычна-паэтычны настрой мерапрыемству задала член Саюза пісьменнікаў Беларусі, кіраўнік літаратурна-музычнай гасцёўні «Крыніца» Раіса Раманчук. Падтрымалі яго прыхільнікі літаратурнай творчасці Брэстчыны: свае вершы чыталі Галіна Ліс (паэтычны клуб «Ліра», г. Баранавічы), Віктар Пінігін (народная літаратурна-паэтычная студыя «Літаратурная правінцыя», г. Лунінец), Ларыса Глеб (Падлеская сельская бібліятэка). Гучалі аўтарскія музычныя кампазіцыі баранавіцкіх выканаўцаў – Аліны Галіцкай, Аляксандра Дразда, народнага аматарскага вакальнага ансамбля «Primavera». Прысутныя пазнаёміліся таксама з новым дакументальным фільмам пра творчасць Міхаіла Пташука «От края и до края» (рэжысёр – Анастасія Мароз), прэм’ера якога адбылася сёлета ў рамках XXX міжнароднага кінафестывалю «Лістапад».
Шмат цёплых слоў удзячнасці прагучала ў адрас арганізатараў мерапрыемства ад самай шаноўнай госці – Лікі Пташук, дачкі кінарэжысёра і сцэнарыста:
– Мае самыя першыя дзіцячыя ўспаміны пра бацьку адносяцца да трохгадовага ўзросту. Мы жылі на той момант у Адэсе, і тата зладзіў мне хатні тэатр: мае падраныя лялькі і звычайная міска пераўтварыліся ў іншапланецянінаў і лятаючую талерку. Так бацька прывіваў мне любоў да культуры і мастацтва. І мы з вамі зараз гаворым аб вельмі важных і значных рэчах: любові да Радзімы, народа, захаванні і ўшанаванні памяці і традыцый, сапраўдным патрыятызме, супольнасці. За гэта я кажу вам «дзякуй». Дзякуй вам за цудоўную беларускую мову, за цёплую сустрэчу. І асобнае «дзякуй», вядома ж, майму бацьку, які навучыў мяне ўсё гэта разумець і шанаваць.
Дарэчы, Ліка Пташук з’яўляецца вядучай праграмы «Дыялогі пра культуру» на канале «Культура» Беларускага радыё, гасцямі якой сардэчна запрасіла стаць Раісу Раманчук, кіраўніка літаратурна-музычнай гасцёўні «Крыніца» і Вольгу Пляшэвіч, дырэктара Ляхавіцкай раённай цэнтралізаванай бібліятэчнай сістэмы.
Лізавета МАЦУЛЕВІЧ, загадчык аддзела маркетынгу, сацыякультурнай дзейнасці і метадычнай работы Ляхавіцкай раённай цэнтралізаванай бібліятэчнай сістэмы Фота Ляхавіцкай раённай ЦБС
