Рашэннем рэспублінскай экспертнай камісіі па народных мастацкіх рамёствах пры Міністэрстве культуры ганаровае званне «Народны майстар Рэспублікі Беларусь» прысвоена Марыі Уладзіміраўне Муха.
Марыя Муха стала дзявятым па ліку майстрам у Ганцавіцкім раёне, атрымаўшым высокую адзнаку за значны асабісты ўклад у захаванне і адраджэнне традыцыйнай народнай творчасці і рамёстваў.
Марыя Уладзіміраўна выдатна валодае многімі відамі народных рамёстваў. Ужо шмат гадоў яна вышывае, пляце паясы, вяжа дзівосныя карункі, а таксама з’яўляецца сапраўдным носьбітам старадаўніх ткацкіх традыцый. Майстар не толькі валодае традыцыйнымі тэхналогіямі ткацтва і вышыўкі і беражліва іх захоўвае, але і дзеліцца сваім вопытам з падрастаючым пакаленнем.
Вышытыя і тканыя ручнікі, вышытыя абрусы і сурвэткі, падушкі – гэта непаўторныя, цудоўныя работы, напоўненыя сонечным цяплом, святлом і любоўю самой майстрыхі.
Наталля БІЛІМАВА, загадчык раённага Дома рамёстваў
Фота з архіва Дома рамёстваў
