Першы абласны літаратурны фестываль «Берасцейскае шматгалоссе» прайшоў на Жабінкаўшчыне. Арганізатарам падзеі выступіла Брэсцкае абласное аддзяленне Саюза пісьменнікаў Беларусі пры падтрымцы галоўнага ўпраўлення ідэалагічнай работы і па справах моладзі Брэсцкага аблвыканкама.
Галоўнай тэмай літаратурнага форуму, прымеркаванага да Года гістарычнай памяці, стала захаванне гістарычнай праўды і ўвекавечанне памяці ахвяр генацыду беларускага народа ў гады Вялікай Айчыннай вайны.
– Мы праводзім шмат цікавых мерапрыемстваў, імкнёмся быць бліжэй да чытачоў і ўзнімаць актуальныя для нашага грамадства тэмы. Таму з’явілася ідэя арганізаваць маштабны літаратурны фестываль. Пачаць вырашылі з Жабінкаўшчыны, бо гэта вельмі самабытны край, багаты на таленты. Гэта радзіма Алеся Каско, Васіля Гадулькі, Васіля Сахарчука, Расціслава і Анатоля Бензерукоў і іншых выдатных аўтараў, – адзначыла Таццяна Дземідовіч, старшыня абласнога аддзялення Саюза пісьменнікаў Беларусі.
Літаратары Брэстчыны сабраліся ў Жабінцы 27 кастрычніка невыпадкова: менавіта ў гэты дзень у 1942 годзе нямецка-фашысцкія захопнікі расстралялі мірных жыхароў Жабінкі і навакольных вёсак. І праз 80 гадоў гэтая трагічная дата болем адгукаецца ў сэрцах людзей. Паэты і празаікі, дзіцячыя пісьменнікі з Брэста, Жабінкі, Кобрына, Іванава і іншых куточкаў вобласці наведалі памятныя мясціны Жабінкаўскага раёна. Яны ўсклалі кветкі ў мемарыяльным комплексе на месцы спаленай вёскі Драмлёва, дзе ў агні загінула больш за 180 жыхароў. У раённым гісторыка-краязнаўчым музеі ў вёсцы Малыя Сяхновічы ўдзельнікі фестывалю пазнаёміліся з экспазіцыяй аб генацыдзе беларускага народа. Завяршыўся маршрут на вуліцы Міру ў райцэнтры, дзе літаратары ўшанавалі памяць ахвяр фашыстаў і ўсклалі кветкі да помнікаў.
– Трагічныя падзеі Вялікай Айчыннай вайны нельга забываць. Калі наведваеш памятныя месцы, дакранаешся да гісторыі, адчуваеш узрушэнне, смутак і гонар за свой гераічны народ. Сёння прыемна было бачыць, з якой пашанай на Жабінкаўшчыне захоўваецца памяць. На мой погляд, гэтыя важныя думкі і пачуцці вельмі шчыра і прачула даносяць да чытачоў нашы пісьменнікі. Праз іх творы нібыта па-новаму адкрываеш малую радзіму. І я ўпэўнена, што сённяшнія ўражанні абавязкова адгукнуцца ў іх душах і выльюцца ў вершах і прозе, – упэўнена Лідзія Раманюк, старшыня праўлення Брэсцкага абласнога аддзялення Беларускага фонда міру.
Працягам фестывальнай праграмы сталі сустрэчы са школьнікамі. Пісьменнікі завіталі ў госці ў сярэднія школы №№1 і 3 райцэнтра, а таксама ў ліцэй г. Жабінкі, дзе распавядалі аб сваёй творчасці, чыталі ўласныя творы і адказвалі на пытанні юных чытачоў. У гарадскім Доме культуры ўдзельнікаў літаратурнага фэсту вітаў старшыня Жабінкаўскага райвыканкама Вадзім Краўчук, які пажадаў пісьменнікам натхнення і новых творчых здабыткаў. Таксама ў межах фестывалю «Берасцейскае шматгалоссе» адбылося ўзнагароджанне пераможцаў абласнога конкурсу «Слёзы сясцер Хатыні».
– Конкурс прысвечаны ўвекавечанню памяці спаленых вёсак, якіх напаткаў лёс Хатыні. У эмацыянальным плане гэта быў вельмі цяжкі конкурс як для членаў журы, так і для ўдзельнікаў. Таму што ўзнятая тэма – вельмі балючая і трагічная. Хачу адзначыць, што свае працы даслалі 100 аўтараў, прычым большасць з іх – настаўнікі. І гэта цудоўна, таму што яны наводзяць масткі памяці паміж пакаленнямі і з’яўляюцца праваднікамі гістарычнай праўды. Конкурсныя творы заклікаюць нас больш рабіць стваральнага, добрага, светлага, каб быць годнымі памяці загінулых землякоў, – расказала Таццяна Дземідовіч.
Дыпломамі пераможцаў конкурсу «Слёзы сясцер Хатыні» былі адзначаны шэсць аўтараў у дзвюх намінацыях. Сярод прафесійных літаратараў лепшымі прызнаны Мікалай Антаноўскі (г. Пружаны), Расціслаў Бензярук (г. Жабінка) і Надзея Парчук (г. Брэст). Сярод аўтараў-аматараў узнагароджаны Марыя Філіпава (г. Баранавічы), Ірына Саломка (г. Іванава) і Надзея Момлік (Кобрынскі раён).
Плануецца, што літаратурны фестываль «Берасцейскае шматгалоссе» стане традыцыйным і будзе праводзіцца ў розных рэгіёнах Брэстчыны.
Алёна САЦУТА
Фота аўтара
