21 лютага на міжнародным узроўні адзначаецца Дзень роднай мовы. Іванаўшчына далучылася да ўшанавання беларускага слова.
Ва ўстановах адукацыі раёна ўчора стартаваў Тыдзень беларускай мовы.
Навучэнцы як гарадскіх, так і сельскіх школ удзельнічаюць у анлайн-акцыі – праз чытанне паэтычных і празаічных твораў прызнаюцца роднаму слову ў любові. Пераможцаў вызначаць 23 лютага.
Апроч гэтага, у сярэдняй школе №2 г. Іванава ў панядзелак працаваў фолк-салон. Яго гаспадары Васіль і Васілінка ў форме віктарыны правялі для гасцей экзамен. Народныя і эстрадныя беларускія песні, гульні, загадкі – увага была звернута менавіта на гэты скарб.
У сярэдняй школе №4 г. Іванава з нагоды Дня роднай мовы пройдзе інтэлектуальная гульня «Я ведаю». Дванаццаць шасцікласнікаў будуць змагацца ў чатырох турах: тлумачыць фразеалагізмы, вызначаць аўтараў твораў, падбіраць беларускія адпаведнікі да запазычаных слоў, ставіць у іх націскі і лічыць гукі. Разумніка чакае прыз. Гульню-падарожжа здзейсняць гімназісты пачатковых класаў. Адолеўшы шэсць цікавых прыпынкаў, вучні падпарадкуюць сабе гарэзлівыя літаркі, набудуць веды па роднай мове.
У будынку Цэнтра культуры і народнай творчасці размешчана беларускамоўная фотазона. Галоўную думку «Важна тое, што ўнутры» дапаўняюць іншыя добрыя словы на мілагучнай мове беларусаў.
У раённай бібліятэцы працуе выстава «Добры дзень, беларуская кніга!». Кожны чытач тут знойдзе свайго аўтара – навукоўца, класіка, сучасніка. Ёсць і пераклады.
Наталля КРЫВЕЦКАЯ
